.: Миний мэдэх БААТАРАА багш минь бурханы оронд харван одлоо

МУИС-ийн Газарзүй Геологийн сургууль /ГГС/-ийн Аялал Жуулчлалын тэнхимийн багш, Арулад овогт Ганбаатарын Баатарцоож 2011 оны 11 дүгээр сарын 09-ны өдөр өвчний улмаас зуурдаар таалал төгсөж, бидэнд нөхөж баршгүй хүнд гарз учирлаа.

Багш маань 1978 онд Архангай аймгийн Цэцэрлэг суманд төрж, 1985-1995 онд Дархан хотын бүрэн дунд сургуулийг дүүргэж улмаар 1995-1999 онд МУИС-ийн БУФ-ийн аялал жуулчлалын менежментийн ангид суралцаж ангийн даргын үүрэгт ажлыг нэр төртэй хийж гүйцэтгэн, анги хамт олноо манлайлагчдын нэгэн байлаа. 1999 онд Чингис хаан дээд сургуулиас хөдөлмөрийн гараагаа эхэлж багш, тэнхмийн эрхлэгч, сургалтын албаны даргаар ажиллаж байхдаа 2002 онд МУИС-д Аялал жуулчлалын чиглэлээр магистрын зэрэг хамгаалжээ.

2004 оноос МУИС-ийн ГГС-ийн Аялал жуулчлалын тэнхимд багшаар ажиллаж Монголын аялал жуулчлал, Тогтвортой аялал жуулчлал, Хөдөөгийн аялал жуулчлал, Бүс нутгийн аялал жуулчлалын төлөвлөлт, зохион байгуулалт хичээлүүдийг зааж байв. Монгол улсад анх удаа багш, оюутанд зориулсан “Тогтвортой аялал жуулчлал” хичээлийн хөтөлбөрийг боловсруулан зааж, гарын авлага хэвлүүлсэн нь аялал жуулчлалын мэргэжлийн бусад сургуулиудад одоог хүртэл мөрдөгдөж байна. Багшлах хугацаандаа олон арван бакалавр, магистрын төгсөлтийн болон эрдэм шинжилгээний ажлыг удирдан хамгаалуулж, “Монголын аялал жуулчлалын тогтвортой хөгжил” сэдвийн хүрээнд судалгааны экспедицийг жил бүр удирдан явж байв.

Г.Баатарцоож багш маань Чингис хаан дээд сургууль, МУИС–ийн Аялал жуулчлалын салбар дахь явган аялал, спорт аяллыг хөгжүүлэхэд манлайлан мэргэжлийн ангийн оюутнуудын хүрээнд Цэцээ гүн, Хагийн хар нуур, асралт хайрханы чиглэлд-явган аялал, Цонжин Болдог-Тоньюкукын чиглэлд-дугуйн аялал, Хамрын хийд, Эрдэнэт-Дарханы чиглэлд-авто аялал, Хустайн нуруу-Өнгөтийн цогцолборын чиглэлд-морин аялал, БНХАУ-ын Хөх хот, Ордос, Бээжин, Чинхуандао, Далянь чиглэлд-танилцах аяллыг жил бүр зохион байгуулж байсан бөгөөд спорт аяллын 2-р зэрэгтэй шилдэг аялагчдын нэг байлаа.

Аялал жуулчлалын судалгаа, мэдээлэл, туршлагаа өөрийн БЛОГ ертөнцөөр бусадтайгаа хуваалцдаг байсан төдийгүй bi_banjig гэдэг түүний ID нэрээр мэдэх хүн цөөнгүй.

Багш маань Монгол улсын аялал жуулчлалын салбарын хөгжилд өөрийн хувь нэмрийг оруулж, Монголын Аялал жуулчлалын багш судлаачдын нийгэмлэгийг үүсгэн байгуулагч, аялал жуулчлалын "АМИН НУТАГ" клуб ТББ-ыг санаачлагч, тэргүүн, “Монголын Үндэсний Атлас”-ын аялал жуулчлалын бүлэг зургийн зохиогчоор ажилласан идэвхитэй гишүүн байсныг МУИС-ийн захиргаанаас үнэлж “Баярын бичиг”, БОАЖЯ-аас Аялал жуулчлалын салбарын “Тэргүүний ажилтан” зэрэг цол, тэмдгээр шагнажээ.

Г.Баатарцоож багш таны Монголын аялал жуулчлалын салбарын хөгжилд оруулсан хувь нэмэр, ажилсаг хичээнгүй, хүнлэг, шударга, тусч, зан чанар тань үеийн үед дурсагдан хадгалагдах болно.

Багш минь та мөнх хөх тэнгэрийн орноо үйл хэргээн үргэлжлүүлээрэй.

Таны мянга мянган шавь нарын өмнөөс

Надад үлдсэн түүний зарим зургуудаас